10 Fîlmên Derhênera Nemir Agnès Vardayê

Nivîs û Amadekar: Rûmet Med (Rûmet Onur Kaya)

Derhêner û Wênekêşa navdar a cîhanê Agnès Varda yek ji pêşengên rêbaza “Pêla Nû” ya Fransayê ye û bi fîlmên xwe yên girahbuha ve di dîroka sînemayê de û di dilên Sînemazan û Hunerhezan de bû nemir.

Dapîra rêbaza Pêla Nû ya Frensayê Derhênera mezin Angès Varda di jiyana xwe ya Sînemayê de; di beşên Fîlmên Dirêj, Belgefîlm û Kurte fîlm de, ji zêdetirî 50 fîlman kişandin. Derhênera azadîperwer û nûjenîxwaz Varda, fîlma xwe ya yekem a bi navê (La pointe-courte – 1954), di 26 saliya xwe de kişand û gelek filmên wê, di bernameya Festîvalên Fîlman de hatin nîşandan û xelatan wergirtin.

Derhênera Femînîst Agnès Varda di dîroka dawiya meha adara 2019’ê de, 90 saliya xwe jiyana xwe ji dest da û li pey xwe hest û ramanên bi dehan fîlmên xwe yên girîng û bandorker hiştin.

Agnés Varda hem derhêner hem jî wênekêşeka mezin bû, di fîlmên xwe de qala bi taybetî jiyan û pirsgirêkên jinan û rewş û mercên civakê ve dike. Mijarên fîlmên wê li ser derd û xemên rencber û bindestên mirovahiyê ye. Derhêner Agnés Varda bi hest û ramanên fîlmên xwe û jiyan û hewlên xwe yên giranbuha û hêja ve bûye yek ji pêşengên Sînemaya Jinan û wê bandorên mezin li ser Sînemaya cîhanê kir.

Ez cara yekem deh salê berê hin fîlmên Derhênera nemir Agnés Vardayê temaşe kiribûm û mijar, hest û ramanên fîlmên ên Derhênera nemir di hiş û bîr û mêjîyê min de bandorên mezin û watedar kirin. Wateyên hevokên û rengên dîmenên Fîlmên wê wekî rengê avên zelal û herikbar diherikînin.

Bêguman hemû Fîlmên Derhênera mezin Agnès Vardayê gelek girîng û watedar in û rengê roniyên xwe cîhanê germ dikin.

*10 Fîlmên Derhênera cîhanê Agnès Vardayê li gorî salên çêkirinê hatine rêz kirin û şîrove kirin.

10 Fîlmên Derhênera Nemir Agnès Vardayê

Mijara fîlma “La Pointe Courte” (1955) li bajarokekî Masîvanan derbas dibe û qala du çîrokan dike.. Çîroka yekem a fîlmê li ser jiyana rojane ya Bajarokê ye û çîroka duyem a filmê jî jiyana jin û mêrek, û hest û ramanên wan ên di derbarê jiyanê de, nîşan dide…

“La Pointe Courte” weke mijar û dîtbariyê balkêş û girîng e, û rêwîtiyeke xweş û aramdar e di xwezaya jiyanê de.. Derhênera fîlmê Agnès Varda weke ramanê derhênereka Femînîst e.

“La Pointe Courte”, di heman demê de yekem fîlma rêbeza Pêla Nû ya Frensayê ye.

“La Pointe Courte” (1955) / Derhêner û Senaryo: Agnès Varda

Sî û neynika demjimêrên demê û kolanên bajêr… Çîrokeke hay jê bûnê, di rengê herîkina jiyanê de…

Stranbêja ciwan bi navê Cléo Victoire, li benda encamên testê ya nexweşiya xwe ye.. Dilê wê dixwaze ku li kolanên Parîsê bigerîne û li bajêr derdikeve rêwîtiyeke kurt û têr û tijî… Fîlma “Cléo de 5 à 7” qala du demjimêrên Stranbêjeke ciwan re dike û di nav herîkina demê de peyv û newayên çîroka haj jê bûnê nîşan dide…

Fîlma “Cléo De 5 à 7”, di bernameya Cannesê û gelek festîvalên fîlman de hate nîşandan û yek ji mînakên herî resen û baş ên pêla nû ya Frensayê ye…

“Cléo de 5 à 7” (Cleo from 5 to 7) – 1962 / Derhêner û Senaryo: Agnès Varda

Agnès Varda di fîlma xwe ya bi navê “Le Bonheur” qala çîroka zewaceke ve dike û li ser diyardeya dilsozîyê de disekine û cureyê wê dram e. Fîlma “Le Bonheur” yek ji fîlmên rêbaza Pêla Nû ya Frensayê ye û di 15’emîn Festîvala Fîlman a Navneteweyî ya Berlînê de du xelatan wertgirtiye.

“Le Bonheur” (Happiness) – 1965 / Derhêner û Senaryo: Agnès Varda

Mijara fîlma bi navê “Les Créaturas” ya Derhênera navdar Agnès Vardayê, li ser çîroka jiyanên Nivîskar Edgar û Jina wî Mylène ye. Piştî qezayeke trafîkî Nivîskar û Jina wî brîndar dibin û ji bo baş bûnê li Giraveke Frensayê dimînin. Nivîskar di demeke kurt de ji birînan xwe xelas dike û paşê ji gelê cihî ve îlham werdigire û dest bi romana xwe ya nû dike. Lê di encama qedaya trafîkê de, hevjîna nivîskarê dengê xwe winda dike û bi tenê bi riya nîşeyên nivîsandî ve xwe îfade dike.

“Les Créatures” (The Creatures) – 1966 / Derhêner û Senaryo: Agnès Varda

Mijara fîlma “Daguerréotypes”ê li kolana Daguerre ya Parîsê derbas dibe û ked û jiyanên rojane yên mirovan û dikanên biçûk ên bajêr nîşan dide.. Derhênera nemir ev fîlma xwe ya “Daguerréotypes” ji bo bîranîna pêşengî wêneyan, hunermend û kîmyanasê Frensayê Louis-JacquesMandéyê kişandiye…

Belgefîlma “Daguerréotypes” – 1976 / Derhêner û Senaryo: Agnès Varda

Fîlma” L’une Chante, L’autre Pas” qala jiyanên du jinan û rastîhevhatinên wan ve dike û têkoşîn û hewlên Jinan ên ji bo jiyaneke xweştir û baş, nîşan dide… “L’une Chante, L’autre Pas”, çîroka dilê dostanî û piştgirîyê ye û di deng û rengên newayên stranan de xwe dide der… “L’une Chante, L’autre Pas” di sala 1977’ê de, di Festîvala Fîlman a Navneteweyî ya Toarmînayê de xelat wergirt.

“L’une Chante, L’autre Pas” (One Sings The Other Doesn’t) – 1977 / Derhêner û Senaryo: Agnès Varda

Hilma rê û azadîyê… Rengê janên birînan û qîrîneke jîndarî…

Fîlma “Bêcih û War” ya Derhênera nemir Agnés Vardayê, qala jiyan û rêwîtiya jineke ciwan re dike û li ser mijar û têmayên azad bûn, tenêtî û êşên jiyanê fîlmeke balkêş û girîng e… “Bêcih û War” di hilma rê û azadîyê de rengê janên birînan nîşan dide û li dijî zor dijwariya jiyanê qîrîneke jindarî û jidil e…

“Sans Toit Ni Loi” (Vagabond) – 1985 / Derhêner û Senaryo: Agnès Varda

Komkerî, di dîroka mirovahî û xwezayê de û pêşveçûn û geşedana jiyanê de bandoreke diyarker û jîndarî kiriye…

Derhênera navdar Agnés Varda di vê fîlma xwe de, li ser diyarde û rêmana komkeriyê disekine û di dilê xwezayê de derketiye rêwîtiyeke dirêj. Fîlma “Komkeran” ji aliyê temaşevanên û derdorên Sînemayê ve gelek hate ecibandin…

“Les Glaneurs Et La Glaneuse” (The Gleaners And I) – 2000 / Derhêner û Senaryo: Agnès Varda

“Sînema ez te hez dikim…”

Belgefîlma “Plajên Agnès” weke kurtejiyan hatiye kişandin û qala beşên jiyana yek ji pêşengên rèbaza Pêla Nû ya Frensayê Derhêner û Wênekêş Agnès Vardayê re dike… Belgefîlma “Plajên Agnès”, li ser Fîlm, Wêne û Hevpeyivînên ên Agnès Vardayê ye û heyam û rêwîtiyên ên jiyana Derhênera nemir nîşan dide…

“Les Plages of Agnès (The Beaches of Agnès) – 2008 / Derhêner û Senaryo: Agnès Varda

Rengê dilê bîranînan û dostanî û rêwîtiyeke rengîn…

Belgefîlma bi navê “Faces Places”ê li ser rêwîtiyên Derhênera navdar a cîhanê Agnés Varda û Hunermendê Wêneyan JRê ye û çîroka wê di gelek herêman de derbas dibe û ji çîrok û wêneyên mirovan pêk tê… .

“Faces Places” (Visages Villages) – 2017 / Derhêner: Agnès Varda, JR û Senaryo: Agnès Varda, JR

Fîlmografiya Derhêner Agnès Varda: https://www.imdb.com/name/nm0889513

Sînemaya Serbixwe – www.sinemayaserbixwe.com

Share This
COMMENTS

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

%d blogcu bunu beğendi: