Ji fîlmê “The Color Purple”yê fragmaneke nû hate weşandin
Fîlmê sînemager û çêker Blitz Bazawuleyî yê bi navê “The Color Purple” ji romana wêjekara navdar Alice Walkerê ya bi heman navê hate kêşandin ku li ser çîroka jiyana jineke çermreş disekine. Ji fîlmê fragmaneke nû ya dirêj hate weşandin.
“The Color Purple” bi çêkerîya pargîdanîya fîlman Warner Bros. Picturesê ve hatiye kêşandin û lêanîneke muzîkî ye. Fîlm, ji romana wêjekar Alice Walkerê ya bi navê “The Color Purple” (1982) weke fîlmê sînemayê hate kêşandin, roman di sala 1982yê de xelata Pulitzerê girtibû. Senaryoya fîlmê Marcus Gardley, Alice Walker, Marsha Norman bi hev re nivîsandine, di destpêka 1900an de diqewime û têkoşîna jineke çermreş a li dijî cihêkarî û bêdadî tîne li ser perdeya spî. Projeya fîlmê îlhama xwe ji muzîkîya dikê girtiye ku di sala 2005ê de ji romana Alice Walkerê lê hatibû anîn.
Halle Bailey û Phylicia Mpasi di “The Color Purple”yê de weke serlîstikvan listîne û di fîlmê de du xwişk in. Di fragmana fîlmê de tê gotin, “Tu tişt ji xwişkatîyê xurttir nîne.” Lîstikvanên wekî Danielle Brooks, Ciara, Taraji P. Henson, Colman Domingo, Corey Hawkins, H.E.R., Louis Gossett Jr. û David Alan Grier jî di fîlmê de cih digirin.
Romana Alice Walkerê di sala 1985ê de ji alîyê derhênerê navdar Steven Spielberg ve weke fîlmê sînemayê hatibû kêşandin û di 11 beşan de ji bo Xelatên Oscarê weke berendam hate nîşandayîn. Steven Spielberg, Quincy Jones û Oprah Winfrey di vê lêanîna fîlmê muzîkî de weke çêker cî girtine. Hate ragihandin ku fîlmê nû dê di 25ê meha Berfanbarê de li Amerîkayê bikeve vîzyonê.
Sînemaya Serbixwe – www.sinemayaserbixwe.com