Kurtefîlmê “Navnîşan” wê li Îtalyayê bê nîşandayîn
Kurtefîlmê “Navnîşan” (The Address, 2022) ji aliyê derhêner û lîstikvanê kurd Aram Dildar ve hate kişandin û lîstikvanên wekî; Ahmet Akman, Ronî Dildar û Erdal Kaya tê de lîstine.
Pêvajoya festîvalan ya fîlmê jî destpê kir ku hate ragihand “Navnîşan” wê li 11emîn Festîvala Kurtefîlman a Navneteweyî ya Visioni Corteyê derbikeve li pêşberî sînemahezan. Bernameya festîvalê îsal di navbera rojên 17-24ê meha Îlonê de li dar dikeve.
Di meha Pûşberê de ji kurtefîlmê “Navnîşan”ê wêneya nû li ser instagrama fîlmê hatibû parvekirin. Senayoya kurtefîlmê “Navnîşan” Aram Dildar bi xwe nivîsiye û sewyana (afîş) fîlmê jî di meha Avrêla 2022yê de li ser twittera pargîdanîya Kyklops Postproductionê weşandibûn.
Derhêner û lîstikvanê kurd Aram Dildar, di sala 1990ê de li bajarê Êlihê (Batman) hate dinê û di gelek komên şanoyê de cih girt. Li beşa Radyo, TV û Sînemayê ya Zanîngeha Marmarayê xwend, bi fîlmê “Press” (2010) cara yekem di fîlmekî metraj dirêj de lîst, derhênerîya kurtefîlmên; “Binevş” (2009), “Da”(2015), “Hazirîyek Bo Derengmayînê” (2018) kirin, di hin fîlman de weke alîkarê derhênerê xebitî. Derhêner, di gelek televîzyonên neteweyî û navneteweyî de derhênerî û alîkarê derhênerîya bernameyan kirine. Dildar, di fîlmên “Mûsa” (2012), “Adem Başaran” (2013) û “Biryareke Zor” (2017) de lîstin, fîlmên wî beşdarî li bernameya gelek festîvalên fîlman ên neteweyî bûn.*
Sînemaya Serbixwe – www.sinemayaserbixwe.com