Kurtefîlmê “Serpêhatiyên Neqewimî” ji Festîvala Fîlman a LUCASê xelata ‘Kurtefîlmê Herî Serketî’ girt

Kurtefîlmê derhênerê kurd Ramazan Kiliçî yê “Serpêhatiyên Neqewimî” rêwîtiya xwe ya festîvalan didomîne û hate eşkerekirin ku fîlm, li bernameya Festîvala Fîlman a LUCASê (Almanya) hate nîşandayîn û xelata ‘Kurtefîlmê Herî Serketî’ girt. Fîlm, çend roj berê ji 8emîn Festîvala Fîlman a Babelê (Îtalya) xelata “Kurtefîlmê Herî Serketî” girtibû.

Senaryoya “Serpêhatiyên Neqewimî” (Tarihte Yaşanmamış Olaylar/Things Unheard Of, 2022) jî Ramazan Kiliç bixwe nivîsîye û kurtefîlm, heta niha li gelek festîvalên fîlman derket li pêşberî temaşevanên sînemayê. Hate ragihandin ku fîlm, li 17emîn Festîvala Fîlman a Navneteweyî ya Temaşevanên Ciwanan a Filem’Onê (Belçîka), li 52emîn Festîvala Fîlman a Navneteweyî ya Molodist Kievê (Ukrayna), 15emîn Festîvala Fîlman a LOBOyê (Brezîlya), 4emîn Festîvala Kurtefîlman a Navneteweyî ya Kutaisiyê (Gurcistan) û 10emîn Festîvala Fîlmên Tirkî (DYA) dê bê nîşandayîn.

Elanur Kiliç, Reyhan Kiliç, Şukran Akti di “Serpêhatiyên Neqewimî” de lîstine. Kurtefîlmên “Arîn” (2016), “Penaber” (2017), “Depo İşçileri” (2018), “Miğfer” (2018), “Servis” (The Shuttle, 2019) yên Ramazan Kiliçî di çarçoveya bernameyên gelek festîvalên fîlman de derketin li pêşberî temaşevanên sînemayê û Kiliç di kurtefîlmê derhêner Turan Hasteyî yê bi navê “Rutubet”ê (2022) de weke çêker cî girtiye.

Çavkanî: Remo Films

Sînemaya Serbixwe – www.sinemayaserbixwe.com