3yemîn Festîvala Fîlm û Muzîkan a Navneteweyî ya Îzmîrê îsal di 16ê Pûşberê de li Navenda Hunerê ya Elhramrayê destpêkir û xelatên festîvalê bi merasimek hatin dayîn. Fîlmê derhênera kurd Ayşe Polatê yê bi navê “Im toten Winkel” (Kor Noktada, 2023) ji festîvalê xelatên ‘Derhênera Herî Serketî’, ‘Fîlmê Herî Serketî’ û ‘Fîlmê Herî Serketî yê SİYADê’ girtin.

Festîvala Fîlm û Muzîkan a Îzmîrê bi piştgirîya Şaredarîya Mezin a Îzmîrê û bi hevkarîya Komeleya Hunerê ya Navçandî ve tê lidarxistin. Derhênera kurd Ayşe Polat bi fîlmê xwe yê “Im toten Winkel” (Kor Noktada) re li festîvalê xelatên ‘Derhênera Herî Serketî’, ‘Fîlmê Herî Serketî’ û ‘Fîlmê Herî Serketî yê SİYADê’ girtin. “Xelata Serketina Hunerê ya Navçandî” îsal dan derhêner û senarîstê navdar ê kurd Behmen Qubadî, “Xelatên Kedê” dan rexnegira sînemayê-wergêr Sevîn Okyayê û akademîsyen-nivîskar Prof.Dr. Oguz Makalî û “Xelatên Rûmetê” jî dan lîstikvan û hunermenên navdar Zuhal Olcay, Erkan Ogur û Grégoire Hetzelî. Derhêner Behmen Qubadî ji bo festîvalê peyameke vîdyoyê şand û ragihand ku “Ez xelata xwe diyarî jinên wêrek ên Îranê dikim.” 11 sehneyên ku ji fîlmên derhênerê navdar ê tirk Nurî Bîlge Ceylanî yên “Kasaba” (1997), “Mayıs Sıkıntısı” (1999) û “Uzak” (2002) hatine hilbijartin bi berhemên cazê ve hatin nîşandayîn.

Fîlm û konserên festîvalê bi direktorîya Vecdî Sayarî derketin li pêşberî hunerhezan ku serokatîya jurîya Pêşbirka Neteweyî ya festîvalê, lîstikvan û hunermend Zuhal Olcay kir û Mehmet Açar, Mehmet Can Ozer, Murat Kiliç, Vedat Sakman, Vuslat Saraçoglu û Zeynep Unal jî weke endamên jurîyê cî girtin. Xelata “Derhênera Herî Serketî” ji aliyê Komeleya Derhênerên Fîlman ve îsal ji bo bîranîna derhêner Duygu Sagirogluyî û xelata “Fîlmê Herî Serketî ya SİYADê’ jî ji alîyê Komeleya Nivîskarên Sînemayê ve têne dayîn. Derhênerê tirk Ozcan Alper bi fîlmê xwe yê “Karanlik Gece” re ‘Xelata Taybet a Jurîyê’  girt û Omer Faruk Sorak jî bi fîlmê ‘Kendî Yolumda’ re du xelat girtin. 

Xelatên 3yemîn Festîvala Fîlm û Muzîkan a Navneteweyî ya Îzmîrê:

Pêşbirka Neteweyî

Fîlmê Herî Serketî: Im toten Winkel/Kor Noktada (Derhêner. Ayşe Polat)

Xelata Taybet a Jurîyê: Karanlık Gece (Der. Ozcan Alper)

Lîstikvanên Herî Serketî: Nurcan Eren (Suna) û Berkay Ateş (Karanlık Gece)

Xelata Muzîka Resen a Herî Serketî: K. Cansun Küçüktürk (Karanlık Gece)

Strana Fîlman a Resen a Herî Serketî: Bu da Geçer – Athena (Kendi Yolumda)

Sêwirana Dengê ya Herî Serketî: Eli Haligua, Fatîh Ragbet (Ayna Ayna)

Fîlm-Yon / Xelata Derhênera Herî Serketî: Ayşe Polat (Kor Noktada)

Fîlmê Herî Serketî ya SİYADê: Kor Noktada

Xelata Konseya Bajarê Îzmirê: Kendî Yolumda (Der. Ömer Faruk Sorak)

Pêşbirka Navneteweyî

Fîlmê Herî Serketî: Joyland (Der. Saim Sadiq)

Xelata Taybet a Jurîyê: Divertimento (Der. Marie-Castille Mention-Schaar)

Xelata Muzîka Resen a Herî Serketî: Nicolás Guerschberg (Dans Başlasın / Let the Dance Begin)

Xelatên Muzîkên Rêzefîlman 

Rêzefîlmê Kanala Neteweyî / Xelata Muzîka Jenerîkê ya Resen a Herî Serketî: Alp Yenier (Omer)

Rêzefilmê Platforma Dîjîtal / Xelata Muzîka Jenerîkê ya Resen a Herî Serketî: Hakan Ozer (Şahmaran)

Rêzefîlmê Kanala Neteweyî / Xelata Strana Resen a Herî Serketî: Serkan-Ece Olçer, Mert Carim (Duy Benî)

Rêzefilmê Platforma Dîjîtal / Xelata Strana Resen a Herî Serketî: Ozkan Ugur – Bîr Bakman Lazim (Erşan Kuneri)

Çavkanî:

Sînemaya Serbixwe – www.sinemayaserbixwe.com