“Serpêhatiyên Neqewimî” ji Endonezya û Xirwatistanê xelat girtin
Kurtefîlmê derhênerê kurd Ramazan Kiliçî yê “Serpêhatiyên Neqewimî” li seranserê cîhanê gera xwe ya festîvalên fîlman didomîne û ji bernameyên du festîvalan xelat girtin. Kurtefîlm, ji Jakarta Film Weekê (Endonezya) xelata “Kurtefîlmê Herî Serketî yê Navneteweyî” û ji Festîvala Kurtefîlman a Navneteweyî ya Film Frontê (Xirwatistan) xelata “Kurtefîlmê Herî Serketî yê Xwendekaran” girtin.
Senaryoya “Serpêhatiyên Neqewimî” (Tarihte Yaşanmamış Olaylar/Things Unheard Of, 2022) jî Ramazan Kiliç bixwe nivîsîye û kurtefîlm, heta niha li gelek festîvalên fîlman derket li pêşberî temaşevanên sînemayê. Hatibû ragihandin ku fîlm, li 17emîn Festîvala Fîlman a Navneteweyî ya Temaşevanên Ciwanan a Filem’Onê (Belçîka), li 52emîn Festîvala Fîlman a Navneteweyî ya Molodist Kievê (Ukrayna), 15emîn Festîvala Fîlman a LOBOyê (Brezîlya), 4emîn Festîvala Kurtefîlman a Navneteweyî ya Kutaisiyê (Gurcistan) û 10emîn Festîvala Fîlmên Tirkî (DYA) dê bê nîşandayîn.
Elanur Kiliç, Reyhan Kiliç, Şukran Akti di “Serpêhatiyên Neqewimî” de lîstine. Kurtefîlmên “Arîn” (2016), “Penaber” (2017), “Depo İşçileri” (2018), “Miğfer” (2018), “Servis” (The Shuttle, 2019) yên Ramazan Kiliçî di çarçoveya bernameyên gelek festîvalên fîlman de derketin li pêşberî temaşevanên sînemayê û Kiliç di kurtefîlmê derhêner Turan Hasteyî yê bi navê “Rutubet”ê (2022) de weke çêker cî girtiye.
“Serpêhatîyên Neqewimî”, herî dawî ji 3yemîn Festîvala Fîlmên Kurdî ya Moskowê xelata ‘Kurtefîlmê Herî Serketî’, ji Festîvala Fîlman a LUCASê (Almanya) xelata ‘Kurtefîlmê Herî Serketî’ girt û ji 8emîn Festîvala Fîlman a Babelê (Îtalya) xelata “Kurtefîlmê Herî Serketî” girtibû. Kurtefîlm, bû yek ji fîlmên fînalîst ên 24emîn Festîvala Kurtefîlman a Îzmîrê.
Sînemaya Serbixwe – www.sinemayaserbixwe.com