“Serpêhatiyên Neqewimî” li Îtalyayê 3 xelat girtin
Kurtefîlmê derhêner û çêkerê kurd Ramazan Kiliçî yê “Serpêhatiyên Neqewimî” li seranserê dinyayê rêwîtîya xwe ya festîvalên fîlman didomîne û ji sê festîvalên Îtalyayê xelat girtin. Kurtefîlm, ji Festîvala Fîlman a SOUQê (Mîlano) xelata “Kurtefîlmê Herî Serketî”, ji Festîvala Fîlman a Navneteweyî ya Bergamo Film Meetingê xelata “Duyemînî” û ji Festîvala Storia in Cortoyê (Mentana) xelata “Kurtefîlmê Herî Serketî” girtin.
Senaryoya “Serpêhatiyên Neqewimî” (Tarihte Yaşanmamış Olaylar/Things Unheard Of, 2022) jî Ramazan Kiliç bixwe nivîsîye û kurtefîlm, heta niha li gelek bernameyên festîvalên fîlman derket li pêşberî temaşevanên sînemayê. “Serpêhatiyên Neqewimî”, li seranserê cîhanê gera xwe ya festîvalên fîlman didomîne.
Elanur Kiliç, Reyhan Kiliç, Şukran Akti di “Serpêhatiyên Neqewimî” de lîstine. Kurtefîlmên “Arîn” (2016), “Penaber” (2017), “Depo İşçileri” (2018), “Miğfer” (2018), “Servis” (The Shuttle, 2019) yên Ramazan Kiliçî di çarçoveya bernameyên gelek festîvalên fîlman de derketin li pêşberî temaşevanên sînemayê û Kiliç di kurtefîlmê derhêner Turan Hasteyî yê bi navê “Rutubet”ê (2022) de weke çêker cî girtiye.
“Serpêhatîyên Neqewimî”, ji Jakarta Film Weekê (Endonezya) xelata “Kurtefîlmê Herî Serketî yê Navneteweyî”, ji Festîvala Kurtefîlman a Navneteweyî ya Film Frontê (Xirwatistan) xelata “Kurtefîlmê Herî Serketî yê Xwendekaran”, ji 3yemîn Festîvala Fîlmên Kurdî ya Moskowê xelata ‘Kurtefîlmê Herî Serketî’, ji Festîvala Fîlman a LUCASê (Almanya) xelata ‘Kurtefîlmê Herî Serketî’ û ji 8emîn Festîvala Fîlman a Babelê (Îtalya) xelata “Kurtefîlmê Herî Serketî” girtibû û bûbû yek ji fîlmên fînalîst ên 24emîn Festîvala Kurtefîlman a Îzmîrê.
Sînemaya Serbixwe – www.sinemayaserbixwe.com